Gözümüz aydın olsun!

   "Qonşudan qalma dala" - prinsipinə əsaslanan türklər Türkiyədə də nəhayət ki "Xalq cəbhəsi" yaratdılar. Qısa desək - "TXC". Yəni Türkiyə Xalq Cəbhəsi. (Türkçə THC). Deyilənlərə görə yaxınlarda təcrübə mübadiləsi aparmaq üçün TXC bizim AXC-yə qonaq olacaq. Lakin türklər bu məqamda biraz çaş-baş qalıblar. Bilmirlər ki, hansı AXC-yə qonaq olsunlar? Axı bilirsiniz ki, Maşallah bizdə AXC-lər çoxdur. O qədər qol-qanad açıblar ki, lap tut ağacı kimi. "Budaq"lar qarışıq düşməsin deyə hər budağın adının əvvəlinə, ortasına, axırına bir hərfdən zaddan da artırıblar. Lakin bu bizim ölkənin "daxili işidir". Kim qarışa bilər?
    Xülasə, indi bizimkilər də düşüb əl-ayağa. Dalbadal müraciətlər ünvanlayırlar TXC-yə ki, bəs əsl AXC bizik. Türk qardaşlarımız da deyir ki, ay qardaşlar, axı siz niyə bu qədər qol-budaq olub parçalanıbsız? Niyə vaxtında sizin budaqlarınızı arıtlamayıblar, aqrotexniki qaydada qulluq etməyiblər sizə? Belə məqamda TXC-yə deyən lazım ki: - Ay TXC, düz buyurursunuz. Bizim bu tut ağacının bağbanı rəhmətə gedəndən sonra ( Allah rəhmət eləsin! ) bu ağaca baxan olmadı və belə yararsız hala düşdü. Hətta budaqlardan bəzilərini qoparıb başqa yerdə də əkdilər. Tutanı da oldu, tutmayanı da. Hətta bu budaqlardan xaricə də apardılar ki, orda calaq eləsinlər öz ağaclarına. Əlqərəz, bu ağacdan day ağac çıxmaz. Ona görə də bu ağacı artıq gözdən çıxarmışıq. Kəsmək lazımdır!
   Kəsmək demişkən, yadıma "Gezi parkı" düşdü. Qorxuram bu "kəsmək" məsələsini eşidən türklər, Bakıya gəlməkdən və AXC ilə tanış olmaqdan vaz keçələr. Axı orda TXC elə ağac kəsməyə görə yaranıb. Yəni ki onların yaranma zərurəti "ağac" olub. Bu ağac məsələsi çox müşkülə düşdü. Məncə Ərdoğan cənablarına xəbər yollamaq lazımdır ki, qardaş bir ağaca görə xalqı incitmə. Qurbandır sənə min ağac. Gəl Bakıya, başla bizim bu "tut ağacı"ndan. Kəs istədiyin qədər. Lap istəsən başqa belə "ağac"larımız da var. Qardaş, gəl başını qat da burda. Niyə Taksimi dağıdırsan axı?